मुंबई - संपूर्ण महाराष्ट्रात सुरू असलेल्या मुसळधार पावसामुळे जनजीवन विस्कळीत झाले आहे. राजधानी मुंबई व उपनगरात बघेल तिकडे पाणीच पाणी झाल्याने वाहतुकीवर मोठा परिणाम झाला आहे. अनेक भागात पाणी साचल्याने मुंबई महापालिकेने शाळा, महाविद्यालयांसह सर्व शासकीय व निमशासकीय कार्यालयांना सुट्टी जाहीर केली आहे. नागरिकांनी अत्यावश्यक कारणाशिवाय घराबाहेर पडू नये, असे आवाहन प्रशासनाकडून करण्यात आले आहे.
मुंबई, ठाणे, रायगड आणि नाशिक जिल्ह्याला हवामान विभागाने रेड अलर्ट जारी केला आहे. कालपासूनच मुंबईत जोरदार पावसाने हजेरी लावली असून अनेक रस्त्यांवर पाणी साचले आहे. मराठवाडा व विदर्भातही पावसाने थैमान घातले आहे. नांदेड जिल्ह्यात विक्रमी 206 मिमी पावसाची नोंद झाली असून आतापर्यंत 7 जणांचा मृत्यू झाल्याची माहिती समोर आली आहे.
मुखेड तालुक्यात झालेल्या ढगफुटीमुळे लेंडी धरणाला पूर आला आहे. परिणामी रावनगाव, भासवाडी, भिंगेली आणि हसनाळ येथील जनजीवन विस्कळीत झाले आहे. रावनगाव येथे 225 नागरिक अडकले होते, त्यापैकी धोकादायक ठिकाणांहून नागरिकांना सुरक्षित स्थळी हलवण्यात आले आहे. भासवाडी येथे 20, भिंगेली येथे 40 तर हसनाळ येथे 8 नागरिकांना बाहेर काढण्यात आले आहे. मात्र 5 नागरिक बेपत्ता असून त्यांचा शोध सुरू आहे.
याबाबत मुख्यमंत्री देवेंद्र फडणवीस यांनी ट्विट करून माहिती दिली. “नांदेड जिल्हाधिकार्‍यांशी सातत्याने संपर्कात आहे. नांदेड, लातूर व बिदर जिल्हाधिकारी एकमेकांशी समन्वय साधत आहेत. बचाव कार्यासाठी एनडीआरएफची एक चमू, लष्करी पथक आणि पोलीस कार्यरत आहेत. छत्रपती संभाजीनगर येथून सैन्याची एक तुकडीही रवाना झाली आहे,” असे त्यांनी स्पष्ट केले.
दरम्यान, छत्रपती संभाजीनगर, बीड, लातूर, जालना जिल्ह्यांनाही पावसाचा फटका बसला असून, अनेक ठिकाणी पूरस्थिती निर्माण झाली आहे. प्रशासनाने स्थानिक पातळीवर मदत व बचावकार्य अधिक गतीने करण्याचे आदेश दिले आहेत.
👉 एकंदरीत, महाराष्ट्रात मुसळधार पावसामुळे परिस्थिती गंभीर असून प्रशासन, पोलीस, एनडीआरएफ व सैन्याच्या मदतीने बचावकार्य सुरू आहे.
