'हर घर तिरंगा' हे अभियान सर्वांनी सहभागी व्हावे - डॉ. सचिन ओम्बासे

उस्मानाबाद प्रतिनिधी 

भारतीय स्वातंत्र्याच्या अमृत महोत्सव पर्वानिमित्त व भारतीय स्वातंत्र्याच्या 76 व्या वर्धापन दिनाच्या अनुषंगाने 'हर घर तिरंगा' हे अभियान उस्मानाबाद जिल्हयात दि. 13,14 व 15 ऑगस्ट 2023 या कालावधीत उत्साहाने आणि उत्स्फूर्तपणे उस्मानाबाद जिल्हयातील सर्व नागरिकांनी तीन दिवसांच्या कालावधीत आपल्या घरावर राष्ट्रध्वज यथोचित सन्मानाने फडकाविण्यात यावा असे जाहीर आवाहन जिल्हाधिकारी डॉ. सचिन ओम्बासे यांनी केले आहे.

राष्ट्रध्वज सन्मानाने फडकाविताना राष्ट्रगीत व राज्यगीत गाऊन राष्ट्रध्वजास सलामी देण्यात यावी. तसेच राष्ट्रध्वज संहितेचे पालन करावे. राष्ट्रध्वजाचा अवमान होणार नाही याची दक्षता घ्यावी.'हर घर तिरंगा' हे अभियान प्रत्येक शासकीय कार्यालयात अनिवार्यपणे राबविण्यात यावे. याचबरोबर जिल्ह्यातील प्रत्येक अंगणवाडी, शाळा, महाविद्यालये तसेच शासकीय आणि निमशासकीय संस्था, खाजगी संस्था, महामंडळे, शासकीय व खाजगी इस्पितळे, सार्वजनिक आस्थापना तसेच खाजगी आस्थापनांची कार्यालये, कारखाने व दुकाने इत्यादी ठिकाणी 'हर घर तिरंगा' हे अभियान उत्स्फूर्तपणे राबविण्यात यावे असे जिल्हा प्रशासनाच्या वतीने सांगण्यात आहे.