तुळजापूर / सिद्दीक पटेल
चार वर्षांच्या प्रशासकीय राजवटीनंतर अखेर तुळजापूर नगरपरिषदेला लोकनियुक्त नेतृत्व मिळणार आहे. नगरपरिषदेच्या सार्वत्रिक निवडणुकीत विकासाचा अजेंडा, ठोस धोरणे आणि स्पष्ट दृष्टिकोन जनतेसमोर मांडत भारतीय जनता पार्टीचे उमेदवार विनोद (पिंटू) गंगणे यांनी प्रचंड बहुमताने विजय मिळवला. या विजयाचे औपचारिक रूपांतर उद्या होणार असून, तुळजापूर नगरपरिषद कार्यालयात लोकनियुक्त नगराध्यक्ष म्हणून त्यांचा शपथविधी सोहळा पार पडणार आहे. याच दिवशी ते नगराध्यक्षपदाचा अधिकृत पदभार स्वीकारणार आहेत.
मागील चार वर्षांपासून नगरपरिषद प्रशासकांच्या माध्यमातून चालवली जात होती. या कालावधीत अनेक विकासकामे, नागरी सुविधा, मूलभूत प्रश्न तसेच दीर्घकालीन नियोजन रखडले होते. लोकप्रतिनिधी नसल्यामुळे निर्णयप्रक्रियेत मर्यादा येत होत्या. मात्र आता जनतेने थेट निवडून दिलेले नेतृत्व कार्यभार स्वीकारत असल्याने शहराच्या विकासाला गती मिळेल, अशी अपेक्षा व्यक्त केली जात आहे.
शपथविधी सोहळ्यास जिल्हा व तालुका स्तरावरील भाजप पदाधिकारी, लोकप्रतिनिधी, विविध सामाजिक संघटना, व्यापारी संघटना तसेच मोठ्या संख्येने नागरिक उपस्थित राहणार असल्याची शक्यता आहे. या पार्श्वभूमीवर शहरात उत्साहाचे वातावरण निर्माण झाले आहे.
नगराध्यक्षपदाची सूत्रे स्वीकारल्यानंतर रस्ते विकास, पाणीपुरवठा, स्वच्छता, ड्रेनेज व्यवस्था, नागरी मूलभूत सुविधा, पर्यटन विकास तसेच श्री तुळजाभवानी मंदिर परिसराचा समग्र विकास या मुद्द्यांना प्राधान्य देण्यात येईल, असा विश्वास समर्थकांकडून व्यक्त केला जात आहे. धार्मिक व पर्यटन नगरी असलेल्या तुळजापूरच्या विकासासाठी नियोजनबद्ध आणि लोकाभिमुख निर्णय अपेक्षित आहेत.
विजयानंतर प्रतिक्रिया देताना विनोद (पिंटू) गंगणे यांनी लोकनियुक्त नगराध्यक्ष म्हणून शहराच्या सर्वांगीण विकासासाठी कटिबद्ध राहण्याचा निर्धार व्यक्त केला होता. त्यामुळे केवळ सत्ताबदल नव्हे, तर कार्यक्षम प्रशासन आणि गतिमान विकासाची नवी सुरुवात म्हणून हा शपथविधी सोहळा पाहिला जात आहे.
चार वर्षांच्या प्रतीक्षेनंतर नगरपरिषदेला लोकप्रतिनिधींचे नेतृत्व लाभत असल्याने तुळजापूर शहरासाठी हा दिवस केवळ औपचारिक नव्हे, तर राजकीय व विकासात्मकदृष्ट्या ऐतिहासिक टप्पा ठरणार आहे, अशी भावना सर्व स्तरांतून व्यक्त होत आहे.
